兒童驗眼, BB驗眼

六個月大BB都可以驗眼?

喺2020年10月嘅時候,我曾經寫過一篇網誌講話四歲先到健康院做第一次驗眼,真係有啲遲喎 :https://www.taikwongeyecare.com/2020/01/四歲先到健康院驗眼會唔會遲咗啲/ 。嗰時自己剛剛開店,礙於資源有限,未能購置Spot Vision Screener,所以只係對外宣傳接受兩歲或以上兒童預約。

如是者,公司就營運咗差唔多四年,多得唔少媽媽嘅支持和推薦,慢慢開始多比較細年紀嘅小朋友嚟驗眼。其實大部分嘅小朋友都好乖,係無Spot Vision Screener 嘅情況吓, 大部分都可以順利做晒所有眼睛檢查,但有時遇到一啲年紀真係好細嘅手抱BB或一啲有特殊需要嘅小朋友,就會心諗:如果我而家有部Spot Vision Screener 就好啦!為咗令自己唔會再有呢個遺憾,終於喺今年嘅4月,將佢收歸旗下,正式為六個月或以上幼童作驗眼服務!

咁Spot Vision Screener 係咩嚟呢? 佢係一部手提嘅儀器,透過分析視膜網反射出嚟嘅光線,評估小朋友嘅近視、遠視和散光度數同埋有無斜視。部機係唔會接觸同個小朋友,大概係1m 左右到進行,小朋友只要望著個鏡頭就可以了。如果小朋友坐得定, 快嘅話二秒就可以完成個檢查。如果想知更多點運作, 可以睇吓呢個Youtube Video: https://www.youtube.com/watch?v=THu-Wqkg4PQ/ 。Spot Vision Screener 其實喺美國推出咗11年左右,都有唔少研究搵過佢嘅準繩度,啲研究結果指出佢嘅準繩度大概有8成左右,其實都好高,不過佢始終都係一個篩查儀器,如果check 到有問題,都要視光師確實個結果。

咁家長都一定會問,咁細個真係有需要驗眼? 其實真係有。全世界都有唔少研究指出約20% 小朋友一出世就有先天視力嘅問題,根據我本人嘅經驗,呢個數字真係差唔多,散深光、鴛鴦度數、深遠視、深近視和斜視等,您諗到或者諗唔到嘅可能性都真係會出現。有清晰嘅視力係學習嘅其中一個最重要嘅元素,一出世到五六歲嘅小朋友係處於一個極速學習嘅階段,如果可以喺好早嘅時候發現到有視力問題,而作出處理,相信對於小朋友將來嘅成長一定有極正面嘅幫助。

P.S. 近排同呀囡Josie讀到一本叫 “未來是這樣嗎? 不一定喔!” 嘅圖書,入面內容嘅旨意大概係講:人唔應該限制咗自己對未來可以發生嘅可能性,要一直抱有開放嘅態度。雖然而家仍然有好多家長覺得小朋友四歲先要驗第一次眼 (可能係健康院收到嘅資訊嘅緣故),不過我仍然會繼續努力,話俾大家知小朋友應該要六個月至一歲就驗第一次眼,因為我信相未來不一定是這樣!

陳家豪, Paco
註冊視光師 (第I部份)

Scroll to top