小朋友戴con MiSight

8歲小朋友都可以戴con? 安全嗎?

香港兒童近視比率相當高,之前我都寫過一篇網誌講家長可以點樣揀唔同兒童近視控制方案 (重溫: https://www.taikwongeyecare.com/2020/03/兒童近視控制方法五花八門究竟要點揀 ) ,其中一種方法就係戴一款有“光學離焦設計”嘅每日即棄隱形眼鏡。家長一聽到小朋友戴con,就通常會問: 咁細個小朋友都可以戴con 架咩? 會唔會唔安全架?以下就會根據一位美國學者喺2017年出嘅一篇評論研究,用較淺白嘅說法同大家講解下:

戴con可引致嘅併發症大致可分為兩種1) 非嚴重角膜發炎和2) 嚴重角膜發炎 (又稱細菌性角膜炎) 。而接下來所講嘅發生率,會以每10年配戴時間為單位,即例如發生率為1宗,意思就係每配戴軟性即棄隱形眼鏡10年,就會有1宗角膜發炎發生。

研究結果指出7-19歲嘅小朋友配戴軟性即棄隱形眼鏡出現1) 非嚴重角膜發炎發生率為0.136宗。7-12歲嘅小朋友配戴軟性即棄隱形眼鏡沒有出現2) 嚴重角膜發炎嘅個案,而13-17歲嘅小朋友配戴軟性即棄隱形眼鏡出現2) 嚴重角膜發炎發生率為0.015宗。

呢啲數字其實都顯示出其實小朋友戴即棄con出現角膜發炎嘅機率並唔高,比起成年人戴con出現角膜發炎嘅機率絕對為低,原因其實係成年人戴con 戴耐咗,有好多行為上嘅轉變,例如:戴著con小睡或訓覺、戴著con沖涼和每日戴好長時間嘅con等,呢啲行為係小朋友戴con嘅時候並不常見,加上小朋友戴con絕大部分都會建議用每日即棄嘅模式,又會作定期覆診,所以小朋友戴con發生問題嘅風險其實唔大。

希望以上資訊可以幫助家長了解更多小朋友戴con 嘅安全性。其實好多研究指出相比配戴厚厚嘅近視眼鏡,戴con可以提升小朋友嘅自信心和生活質素,有興趣了解更多邊款每日即棄con 既可以控制近視加深和安全,又可以提升小朋友嘅自信,歡迎隨時PM我哋啦!

評論研究原文:https://www.ncbi.nlm.nih.gov/pmc/articles/PMC5457812/

陳家豪, Paco
註冊視光師 (第I部份)

Scroll to top