新型肺炎肆虐，冇生意，趁而家得閒就講下一樣我執業左四五年之後，先真真正正學懂嘅道理。
眼科視光學係一門醫療有關嘅學科，喺受訓練嘅時候，我哋都不斷被灌輸一個名為循證實踐/醫學(Evidence Based Practice/Medicine) 嘅概念，佢係醫護人員喺做臨床決定嘅時候，個腦海有三樣要諗嘅嘢 ：
1）喺做呢個決定嘅時候，究竟有冇一啲最佳嘅醫學研究，證明你嘅決定係對病人有利？
2）喺做呢個決定嘅時候，究竟有冇相關嘅臨床經驗？
3）喺做呢個決定嘅時候，究竟有冇顧及到人客或病人嘅價值和期望？
第一同第二點，基本上冇乜嘢可以講，做好佢係身為視光師或者醫護人員應該要做嘅事。而第三點反而我覺得先係循證實踐/醫學嘅精粹或者最人性化嘅一面，有好多時候當我地日復日去做同一樣野嘅時候，就會有個潛意識覺得對住呢個人客或病人，就一定係用某一個方法去處理，好多時就係忽略咗人客或病人嘅價值同期望，其實或者嗰個人客根本就唔想接受呢一種嘅處理方法。所以細心聆聽人客講嘅說話和了解佢哋嘅需要，其實係喺實踐循證醫學扮演一個好重要嘅角色，尤其係我哋視光師呢一個行業，因為有好多時我哋做嘅決定都未必關乎生死，人客其實有幾大嘅自由度去選擇，而我哋嘅角色就係講清楚每一個選擇嘅利與弊，根據人客嘅期望，先作出一個最終嘅專業決定。
我仲記得起初畢業嘅時候，明明覺得某種方法係對呢個人客來講，係一個最好嘅決定，但最後佢冇接納到而感到唔開心，不過當我真真正正咁了解循証實踐/醫學嘅時候，已經冇咗呢種唔開心嘅感覺，反而它令我有更大嘅動力去真切了解每一位人客嘅要求和期望，為人客尋找最合適佢地既解決方案。
陳家豪, Paco
註冊視光師 (第I部份)