2025年年初，公司終於添置咗眼軸長度測量儀，而家做兒童近視控制管理，有眼軸長度測量儀都差唔多變咗Gold Standard。因為我哋做幼童驗眼為主，啲小朋友長大到7-12歲左右，唔少都變咗近視，所以度眼軸長度變得越嚟越重要。
量度眼軸長度主要係用嚟監察近視有無加深同埋加深嘅速度，眼軸長度和近視加深嘅度數係成正比的，眼軸每長0.1mm，近視就約增加約25-30度，所以只要幫小朋拎咗一個基準 (Baseline)數據，將來跟呢個數據比較，就可以知道近視係唔係真係深咗。而家亦有一啲軟件可以因應小朋友年紀和眼軸長度，去估算小朋友將來發生近視嘅機率。
600或以上的近視已被定義為深近視，其實做兒童近視控制管理最主要嘅目的就係唔希望啲小朋友去到600或以上嘅近視，因為深近視會大大增加患唔同眼疾嘅風險 (重溫: https://www.taikwongeyecare.com/2019/11/深近視又有咩好怕喎/ )。無近視成人嘅眼軸長度一般係23-24mm, 去到26mm以上通常都變咗深近視度數，所以如果小朋友眼軸係超過26mm, 長大之後患上唔到眼疾嘅風險都會大增。
不過近呢6-7年多咗唔少近視控制方法俾家長選擇，筆者係5年前曾經寫過一篇網誌講解唔同方法嘅成效: https://www.taikwongeyecare.com/2020/03/兒童近視控制方法五花八門究竟要點揀/ ，入面啲資料大致都仲啱，家長有興趣了解就可以㩒入去睇吓啦！希望以上資訊可以增加家長對眼軸長度和近視嘅認識，我哋而家最細可以為六個月或以上嘅幼童作驗眼服務架啦!
P.S. 家姐Josie而家大個咗，可以幫兩個細佬做立體感檢查。😂
陳家豪, Paco
註冊視光師 (第I部份)