fbpx

兒童護眼 – 防藍光眼鏡有用嗎?

早排因疫情關係,好多小朋友都被迫要網上上課,好多家長都問究竟防藍光鏡有冇用?雖然呢個星期大部份學校已經開始上番實體課,不過本人之前對於防藍光鏡是否有功效做過一啲research同問過一啲專家嘅建議,唔想浪費咗呢啲資訊,今個貼文就就住呢個問題,將我所認知嘅知識分享比大家。

喺講防藍光鏡有咩正面幫助之前,先解答左家長另一個經常問嘅問題:究竟防藍光鏡可唔可以預防近視嘅出現或者減慢近視加深嘅速度?現階段個答案係不會的。暫時冇咩大型嘅研究證實防藍光鏡可以預防近視,咁究竟佢仲有啲乜嘢好處呢?本人綜合出以下三個防藍光鏡可帶來嘅優點:

1. 減少長期觀看電子屏幕所帶來嘅刺眼感覺。當藍光穿過角膜和晶體產等眼睛結構時,比較其他顏色嘅光較容易出現散射(scattering),過量散射嘅光線會增加刺眼嘅感覺,當藍光被鏡片阻隔後,散射現象減少,電子屏幕所發出嘅光線會變得相對較柔和和集中,從而減少不適嘅感覺。

2. 晚間觀看過量有藍光嘅電子產品,會影響睡眠質素。腦內有一個叫松果體嘅腺體 ,佢係用嚟調節生理時鐘。白天太陽入面嘅藍光會抑制松果體分泌一個名為退黑色素嘅荷爾蒙,使我哋喺白天嘅時候沒有睡意,精神咁工作或上學。晚間沒有陽光,體內嘅退黑色素便會上升,產生睡意並使我們容易入睡。若於晚間接觸過量有藍光嘅電子產品,體內嘅退黑色素便會變得較少,使我們較難入睡 ,防藍光鏡便可以將呢個情況改善。

3. 過量接觸藍光,或會影響視網膜黃斑點嘅健康。呢個論點較具爭議性,因為暫時都係喺一啲動物實驗發現呢個問題,至於人眼,仲需要一啲大型嘅研究去支持呢個論點,不過從理論上來講,由於紫藍光嘅波長較短,能量和穿透性較高,長期接觸,唔多唔少或者對黃斑點嘅細胞都會帶來一啲氧化壓力,增加病變嘅風險?

所以綜合以上三個 “優點”,平時做兒童驗眼嘅時候,我都冇特別同家長講小朋友一定要配防藍光眼鏡,若家長真係想買個安心,建議你哋揀選一啲質素較好,有防反光鍍膜嘅平光藍光鏡, 冇防反光鍍膜嘅鏡片只會增加入眼嘅反光,增加刺眼感覺,得不償失。我亦都唔建議鏡片太黃嘅防藍光鏡,因為會令觀看嘅事物帶來色差。有興趣了解本視光中心嘅平光防藍光眼鏡收費,歡迎隨時查詢

希望以上資訊可以解答部分家長經常問防藍光眼鏡有用嗎呢個問題!最後,有需要或想幫自己子女驗眼既家長都歡迎隨時查詢,本視光中心接受兩歲或以上嘅兒童預約的。

陳家豪, Paco
註冊視光師 (第I部份)

延伸閱讀:
兒童護眼 – 小朋友眼睛需要防UV紫外線嗎?

Scroll to top