長者驗眼 – 長者睇野一定眼矇矇嗎?

本人除咗專注做兒童驗眼之外,長者亦都係另一群我經常會遇到,並對全面眼科視光檢查有殷切需求嘅人客。好多時同長者驗眼傾偈時 ,都會聽到佢哋話:年紀大,眼矇矇好正常啦。係,長者係大啲機會眼矇,不過都要搵出原因,病向淺中醫咁樣去處理先為上策,因為有好多眼病去到晚期先發現,視力已經不能逆轉了。以下就講吓一啲最常見影響長者視力嘅原因和毛病:

1. 度數問題
呢一代嘅長者,影響遠距離視力嘅度數大多都係遠視和散光(佢地唔多係近視,可能因為5-60年之前電子產品還未興起有關。),而影響近距離視力嘅度數就係老花。去到呢度一定有人問:遠視唔係即係老花咩?唔係,佢哋係兩樣完全唔同嘅嘢。遠視係因為先天眼球過短而引起的,有遠視嘅長者,年輕時候睇遠野係好清楚的,不過隨着年紀嘅增長,遠視會令到睇遠嘅嘢變得模糊。而老花係講緊睇近野嘅時候出現嘅度數,成因係眼內晶狀體變和睫狀肌變硬咗,導致聚焦唔到近距離嘅事物。不論係遠視、近視、散光和老花,都可以用鏡片去矯正視力,如果想睇嘢清楚啲,改善生活質素,就應該配返一個合適嘅眼鏡。但當眼鏡不能完全矯正視力,長者就要進行眼睛健康檢查查明原因,一個稱職嘅註冊視光師 (第I部份),係絕對有能力去作出診斷。

2. 白內障
白內障主要成因係眼內晶狀體隨着年齡老化已變得混濁,早期病症係視力模糊和對光線變得敏感。佢嘅普及程度猶如老花,好多長者都會有呢個問題,暫時只有手術先可以將佢根治,令視力變回正常。如果唔想白內障惡化得咁快,平時可以做足防太陽紫外線嘅措施,例如戴太陽眼鏡、擔遮和戴帽等。

3. 青光眼
青光眼嘅別名係視力小偷。點解佢有呢個名呢?因為早期嘅青光眼對中央視力影響唔大,佢會慢慢咁將您周邊嘅視力偷走。如果晚期先發現,視野會收縮得好窄,有個人企係你旁邊你都唔會察覺到。 最有效檢查青光眼就係做一個放大瞳孔眼底檢查,觀察視神經嘅形態,如果發現視神經嘅形態異常,就要進行一啲更深入嘅青光眼檢查如視野圖檢查和OCT 掃描去作出診斷。

4. 視網膜病變
長者常見嘅視網膜病變有老年黃斑點病變、黃斑點前膜、視網膜撕裂和糖尿上眼等,呢啲視網膜病變都要透會放大瞳孔眼底檢查先會被診斷出來。喺黃斑點出現嘅眼疾大多數都會影響中央視力,症狀較為明顯,不過有時候只有一隻眼睛患病,長者去到好晚期先無意中發現,就已經太遲,視力不能回復正常。所以長者平時可以交替遮蓋左右眼,如果有一隻眼睛視力比起另一隻眼睛差好多,建議你盡快進行全面眼科視光檢查。沒有這個情況的話,都應該一年進行一次全面眼科視光檢查,確保視力和眼健康正常。

希望以上資訊可以增加長者要定期驗眼嘅意識啦!有問題歡迎隨時提問,謝謝關注。

陳家豪, Paco
註冊視光師 (第I部份)

Scroll to top