兒童謢眼 – 幼兒可使用電子產品嗎?

平日做兒童驗眼,都會問吓家長小朋友嘅病歷同埋佢哋嘅生活習慣,發現唔少家長喺小朋友一兩歲嘅時候已經比佢哋接觸電視和電子產品,而且時間都唔短,有啲更每日高達每日三至四個鐘,疫症期間更甚。政府衛生署其實有唔少有關兒童應如何使用電子產品嘅資訊,製作得都幾好,不過可能冇咩宣傳,YouTube個video都係得千幾個views。以下我就綜合咗幾個重點,希望多啲家長知道應該點做,如果想睇更多詳細資訊,文章結尾會有衛生署嘅連結。

– 2歲前:

2歲前嘅小朋友應盡量避免讓觸電視或電子屏幕產品。呢個年紀嘅小朋友其實係需要大量嘅親子互動,過分使用靜態嘅電子產品,只會削減親子互動嘅時間,亦都會影響佢地視力、骨骼和社交等嘅發展。除非喺家長嘅陪同下,小朋友可以同屋企人利用電子產品進行視像通話。若家長真係覺得小孩可以利用電子產品進行富教育意義嘅活動,喺你嘅陪同底下,都可以進行有限度嘅屏幕活動。

– 2到5歲:

2到5歲嘅小朋友每天觀看電視或使用電子屏幕產品嘅累積時間,應限制在1小時以內。而做呢啲屏幕活動應要互動和富教育性的,亦要係家長嘅指導下進行。

– 睇幾耐要休息?休息嘅時候要做啲咩?

家長可以記著20-20-20法則:即係小朋友觀看20分鐘電視或電子屏幕產品,就應該望20呎(6米)以外嘅遠距離事物20秒鐘。

– 什麼是使用電子屏幕產品和觀看電視嘅合適距離?

手機:30-40厘米/  電子屏幕:40-50厘米/ 電腦:60-70厘米/ 40吋電視:1.5米左右 (電視大啲就要遠啲,細啲就可以近啲)

– 電子屏幕產品會影響睡眠質素?

電子屏幕產品所釋放嘅藍光會抑制腦內退黑色素嘅分泌,減低睡眠意欲。所以睡前約1小時,應建立輕鬆的睡前規律,不宜使用屏幕產品,也不應擺放任何電子屏幕產品在睡房內,以免影響睡眠質素。

最後,家長應以身作則,盡量係小朋友面前過量使用電子產品。筆者都有個兩歲幾嘅女,佢一見到我用手機,都會好好奇要睇埋一份,有時都想佢靜靜地坐係到,都會開一陣電視俾佢睇,但都盡量做到以上嘅要點,希望阿女唔好咁快養成一個依賴電子產品嘅習慣。由於平日做兒童驗眼,真係會見到啲三四歲小朋友已經有兩三百度近視嘅個案,所以家長如果成日都俾您地嘅小朋友睇電子屏幕產品,就應盡快帶佢地檢查下眼睛,太遲先發現有視力問題就麻煩了。

陳家豪, Paco
註冊視光師 (第I部份)

衛生署連結: https://www.studenthealth.gov.hk/tc_chi/internet/recommendations/recommendations_parents.html?fbclid=IwAR0FxK1x6wxX3TXZVjtR4_xT-1I-qmDbt7jqgiVlLsb_y2sTilLib_JAJa0

Scroll to top