fbpx

戴Con 有壽命嗎?

呢條問題間唔中就會有人客問,咁就等我喺呢度解答一下啦。個答案理論上來講係冇壽命的,我都遇過唔少6、70歲嘅人客仲戴住老花漸進Con,個角膜都好正常,可以繼續戴落去。所以個問題應該係咁問: 有乜嘢因素令到戴Con嘅人唔可以繼續戴Con呢?

1) 老花、近視和散光三樣嘢同一時間出現

當去到40幾歲,每個人都會有老花嘅問題,睇唔清楚近野。事實上,老花漸進Con其實已經喺市面上賣咗2、30年,不過多數都淨係處理到近視加老花,而且遠和近視力並不是完美,大致可以應付日常需要。如果老花、近視和散光三樣嘢同一時間出現,即棄隱形眼鏡大部份暫時都係處理唔到,所以有近視和散光嘅人客,當老花出現嘅時候,就或者會選擇唔繼續長戴Con。不過有個好消息,就係喺2019年尾,有商家喺歐洲引入左隻高透氧矽水凝膠做嘅 (月棄/ 三個月棄) 個人化隱形眼鏡,最多可以處理到3000度近視、800度散光和400度老花。由於係個人化訂製和喺歐洲製造,價錢會相比一般即棄老花漸進Con貴一點,有需要嘅朋友歡迎隨時查詢

2) 角膜唔夠氧氣

隨著高透氧矽水凝膠做嘅隱形眼鏡嘅出現,因為戴Con而出現角膜缺氧呢個併發症,已經少咗好多。不過我當然仍然會見到呢啲個案,因為仲有人客戴緊低透氧水凝膠做嘅隱形眼鏡,角膜血管增生、眼白出現紅根和角膜變得唔平滑都係一啲常見嘅缺氧症狀,見到呢啲情況,我通常會建議人客轉戴高透氧矽水凝膠做嘅隱形眼鏡。不過有某部份人客,想轉都冇得轉,就係深散光嗰班人客,因為一般即棄隱形眼鏡最多都係處理到275度散光,一超過呢個度數,就要用返傳統低透氧水凝膠年戴Con。不過都係嗰個好消息,就係最新嗰隻歐洲訂製嘅個人化隱形眼鏡,或者係你哋嘅救星,因為佢可以處理到最多800度嘅散光。

3) 眼乾

眼乾係一個好普遍嘅眼睛毛病,尤其係亞洲女士就更加普遍,由於隻Con本身係吸水,佢亦都會打亂左本身淚液黏附係角膜嘅能力,所以戴Con嘅人容易啲覺得眼乾係無可厚非的,而眼乾只會隨着年紀越來越明顯,所以有唔少人客去到中年嘅時候,因為隻眼乾得滯,就唔想再戴Con。不過其實眼乾都有唔少方法處理嘅,只要對症下藥,其實係會有所改善的,本人嘅網頁都有一啲自然治療眼乾嘅小貼士,有興趣嘅朋友都可以睇吓:http://www.taikwongeyecare.com/全面眼乾症診斷及治療/

總括而言,視力、眼睛角膜健康和舒適度係三大重要因素決定可否持續戴Con,只要喺呢三點取得一個平衡,戴Con係沒有壽命的。希望以上資訊幫到啲長期戴Con 並對呢個問題好奇嘅朋友!最後,提提大家,戴開Con嘅朋友,應該最少每年搵有提供全面眼科檢查或隱形眼鏡配後跟進檢查嘅註冊視光師 (第I部份)檢查一下,確保視力和眼健康係最佳狀態,咁就戴得安心又放心!

陳家豪, Paco
註冊視光師 (第I部份)

Scroll to top