fbpx

兒童驗眼 – 點樣幫小朋友驗度數?

相比起19年8月自己剛開店,呢排幫幼童/兒童驗眼嘅頻率的而且確係高咗少少,有感而發,想讚揚一下跟著我上山下海12年嘅Retinoscope (視網膜檢影鏡)。

佢應該係成間視光中心,最具成本效益嘅一個驗眼工具,冇記錯大概值三千幾蚊,不過佢做緊一樣好重要嘅工作,就係幫我判斷小朋友眼睛度數。我記得做學生嘅時候睇過本教科書講Retinoscope 嘅好處係度數驗得準確,唔好處係好似一門藝術咁需要時間去熟練佢。12年後嘅今日,我完全明白本教科書個作者講緊乜嘢,因為真係需要啲時間去磨練。

有好多家長都問咁細個小朋友點驗度數呀?就係靠Retinoscope。當然電腦驗眼儀個度數都有一定嘅參考價值,但當個小朋友唔肯合作做電腦驗眼儀或者電腦驗眼儀跟Retinoscope 個結果有多大出入,我一定會相信由自己眼睛睇出嚟Retinoscope 嘅結果作度數最後判斷。

甘又有人可能會問,點解平時自己驗眼嘅時候,唔多見個視光師拎技Retinoscope 出泥?因為成年人可以俾到反應答一鏡定二鏡清,做到主觀驗光 (Subjective Refraction),如果人客合作,呢個驗光方法係最準和細緻。但當遇到兒童驗眼嘅時候,客觀驗光 (Objective Refraction) 嘅方法如 Retinoscopy 和電腦驗眼儀就變得極為重要,因為已經冇其他臨床方法去判斷佢地個度數。所以如果有一枝Retinoscope、一盤試鏡和一個有經驗用Retinoscope嘅視光師,基本上任何人嘅眼睛度數都可以被判斷出來。最後講多句,佢叫客觀驗光嘅原因係因為個度數係由視光師客觀地判斷出嚟,而唔係由人客主觀甘話我知邊一個鏡嘅度數最為清晰。

希望以上資訊可以解答部分家長經常問點樣幫小朋友驗度數嘅呢個問題!有需要或想幫自己子女驗眼既家長歡迎隨時查詢,本視光中心接受兩歲或以上嘅兒童預約的。

陳家豪, Paco
註冊視光師 (第I部份)

Scroll to top