fbpx

斜視矯正訓練真係咁難做?

本人以往曾接觸不少有條件完成斜視療程訓練嘅患者,但最終都係差啲先能夠完成整套訓練。綜合本人嘅經驗,呢個帖文想講下能夠成功完成整套斜視矯正訓練嘅重要因素。

1) 訓練要有趣
講得係訓練,其實又點會係有趣呢?的而且確,真係幾沉悶。由於訓練嘅對象大多數都係小朋友,用一啲傳統斜視訓練嘅硬件,根本就吸引唔到啲小朋友持續咁去做訓練,而且傳統嘅硬件訓練好難有一個機制去判斷小朋友究竟做得啱唔啱,同埋有冇真係去做訓練。所以而家進行嘅斜視訓練,開始時,我都係圍繞着一個由美國眼科視光師研發名為HTS2嘅斜視矯正訓練電腦軟件為主軸,HTS2除左可以好完善咁去監察患者究竟做得啱唔啱,亦都可以知道患者有冇每日在家中做練習。家長或者會擔心,咁即係鼓勵我小朋友每日對住個電腦去打機?個答案係每日對住個電腦2-30分鐘,做訓練,唔係打機。再講,我唔會淨係要求個小朋友利用個軟件去學識點樣收緊眼外肌,仲會教佢哋點樣放鬆眼外肌,其實係一個好全面嘅訓練,最終係想個小朋友或成年患者增加眼外肌嘅柔韌度,同埋學懂一啲做斜視矯正訓練嘅回饋機制 (feedback mechanisms),為以後學懂如何自由內轉和自由外轉眼球定下重要嘅基礎,勤力嘅患者基本上三至五個月每日重複嘅練習,已經可以甩咗呢個電腦程式,進行其餘高階嘅斜視矯正訓練,至於高階嘅訓練,係完全唔需要用電腦的。

2) 家長要配合
成年患者,呢段可以唔使睇,咁大個人應該識得點樣分配時間?但小朋友就有啲唔同,好多時候都要家長提醒做訓練,亦有某啲訓練要家長幫手同個小朋友一齊做,確保個小朋友正確咁進行訓練。家長仲要定期帶小朋友到視光中心學搵視光師學新野,所以家長喺斜視矯正訓練當中扮演着一個好重要嘅角色㗎!

3) 患者要有恆心
做斜視矯正訓練就好似學習一樣新野咁,冇恆心持之以恆去學一樣野,又點會學得識學得好?至於個恆心好大程度係取決於患者本身覺得斜視係唔係一個問題:閱讀會唔會有好大影響?外觀會唔會有好大影響?如果患者本身都覺得斜視唔係一個咩問題,其實好難有恆心去持續六至九個月不停做訓練。對於無動力嘅小朋友,家長指導嘅角色就變得非常重要,視光師嘅角色就係盡量令到個訓練有趣,增加患者嘅動力,繼續堅持落去。

4) 要找對的視光師
其實係醫管局同衛生署,大概有20多個視覺矯正師為有雙眼視覺障礙嘅病人進行評估檢查及提供非手術治療,不過得咁少人手,據報章報導,睇到佢地都要等半年時間。至於剩低具備斜視矯正訓練這方面專業知識嘅專業人士,就只有註冊視光師 (第I部份)。不過,由於此專職醫療服務比較冷門,相信喺香港有做關於斜視矯正訓練嘅註冊視光師 (第I部份)保守估計30個以內?本人說不上是這方面嘅專家,只不過對這方面有多一點經驗和興趣,有需要嘅朋友和家長可以交流一下,睇吓幫唔幫到您吧!

陳家豪, Paco
註冊視光師 (第I部份)

Scroll to top