fbpx

斜視矯正訓練 – 唔使做手術都可以治療斜視?

斜視矯正訓練對於隱性斜視患者,其實係非常有效咁改善閱讀時出現的眼睛疲勞或間歇性看見重影的問題。不過由於隱性斜視係外觀上察覺不了,好多人都唔知道自己有隱性斜視,亦冇諗過去做咩訓練或者驗眼時主動提出自己有閱讀困難,而不了了之。亦因如此,筆者接觸得最多需要做斜視矯正訓練嘅患者係有外顯性斜視(俗稱射哩眼)嘅小朋友或成年人。

由於射哩眼影響外觀,家長或患者都比較緊張,想知道除咗手術之外,仲有冇其他方法可以處理。根據筆者嘅經驗,斜視矯正訓練最有效的治療對象有以下條件:

1)外斜角度不能太大,25-30度差不多已經是上限。
2)斜視是間歇性出現於看遠或看近。
3)有一定程度嘅立體感。

從書本上所獲得的知識,斜視矯正訓練可以分為感官(sensory)和肌肉(motor)訓練。有立體感嘅話,基本上都唔需要點樣做感官訓練,亦由於感官訓練需時好長,好多時候患者喺初期已經放棄。所以如果外斜視嘅患者嘅立體感好差,通常我都唔會好建議佢哋做斜視矯正訓練,除非患者或家長好堅持要嘗試。

如果有一定程度嘅立體感,肌肉訓練就來得相對簡單,情況就好似幫圍著眼球外個六條肌肉做gym甘,每日不停咁重複做20-30分鐘嘅眼肌訓練,持之以恆,當肌肉練強壯左之後,外斜視出現嘅頻率必定能夠減少,至於斜視角度能否減少就因應個別個案而有所不同。你可能會問,咁要做幾耐啊?一般勤力嘅患者,半年至九個月(每月上兩堂),已經可以將我想教嘅嘢學識,隨後患者都要自己喺屋企不定時咁做下訓練,保持眼肌肉嘅記憶,先至能夠保持斜視不常常出現嘅情況。你又可能會問,斜視訓練咁即係點樣做啊?用文字泥形容,其實真係有點複雜,筆者都用左差不多半年嘅時間學習理論,再用上一年嘅時間實踐,先可以學到將自己嘅眼球自由內轉及有限度地自由外轉,所以真係要預約上下堂先至會學得識。

至於顯性內斜視(俗稱鬥雞眼),點解隻字不提呢?因為好多時候有內斜視嘅患者都可以透過佩戴遠視度數嘅眼鏡去矯正內斜視,如果遠視度數不能矯正全部嘅內斜視,剩下嘅內斜視一般都比較頑固,通常都係持續地出現於看遠和看近距離,所以斜視矯正訓練對於這些患者係有一定嘅難度。不過,世上無難事只怕有心人,如果內斜視係屬於間歇性的和患者有一定嘅立體感,筆者都有信心可以處理。

陳家豪, Paco
註冊視光師 (第I部份)

Scroll to top