fbpx

兒童驗眼 – 四歲先到健康院驗眼,會唔會遲咗啲?

兩歲前:
根據美國眼科視光師協會(American Optometric Association)嘅建議,6到12個月大嘅嬰兒,應該搵眼科視光師進行一次全面嘅眼睛檢查。可能有好多家長會有疑問,咁細個小朋友真係有需要check 嗎?其實係有,因為好多時候眼睛嘅問題都係冇咩症狀,而視力發展亦都係出生第一年急速發展,如發現有較嚴重嘅眼睛問題,係需要呢個年紀處理。筆者仲記得2013喺理工大學度做駐院眼科視光師嘅時候,曾經驗過一個九個月大既BB, 嗰時驗到佢有600度嘅先天性近視,雖然個案極為罕見,但眼睛始終都係人體結構, 有時出現先天性嘅問題係無可厚非。所以家長如果發現嬰兒喺三到六個月嘅時候,仍然未有眼神接觸,就應立刻帶他進行眼睛檢查。咁要去邊度檢查?香港理工大學眼科視光學診所(電話:2766 5225)係接受手抱BB嘅年齡嘅眼睛檢查,或者眼科醫院都會接受呢啲年紀嘅小朋友嘅檢查。至於家長錯過咗喺六個月進行眼睛檢查,本視光中心係接受兩歲以上嘅兒童預約

三到五歲:
三歲嘅小朋友基本上都可以進行一個透徹嘅全面眼科視光檢查,斜視、弱視、色弱 、度數問題和眼健康問題基本上係呢個年紀都可以check得一清二楚。等到四歲先去健康院,老實講真係有點遲。視力和立體感係三歲已經要發展得7788,去到四歲先發現有問題,花嘅處理時間一定比喺三歲或之前發現為長,所以眼睛檢查應該越早做越好。

六到十八歲:
六歲之後基本上每年都要進行一次全面眼科視光檢查。唔好彩有弱視嘅話,喺九歲之前都仲有機會矯正,不過係六歲先發現子女有弱視,家長絕對係責無旁貸!至於香港學童最為普遍嘅近視問題,一般會喺8到12歲呢個階段變化得最多同最快,每年驗眼係有絕對既必要。所以兒童驗眼真係要由細做直至做到18歲左右,眼睛發育停下來,才可以稍作鬆懈。

陳家豪, Paco
註冊視光師 (第I部份)

Scroll to top